Elèv Jakmèl yo desann nan lari apre twa semèn grèv pwofesè

Elèv lise Pinchinat ak Célie Lamour te desann nan lari Jakmèl lendi 9 novanm 2026 pou mande pwofesè yo retounen nan klas. Yo denonse sa fè twa semèn lekòl kanpe akoz grèv pwofesè yo.

Yon rankont ak direksyon depatmantal la

Manifestan yo te ale nan Direksyon Depatmantal Edikasyon Sidès la. Direktè depatmantal la, Mascary Lévêque, te resevwa reprezantan elèv yo pou yo pale sou revandikasyon yo.

Apre echanj sa a, li bay asirans otorite yo ap travay pou jwenn yon solisyon rapid pou grèv la, pou elèv yo ka retounen lekòl nòmalman. Pa gen okenn dat pou kou yo rekòmanse, ni pozisyon pwofesè ki an grèv yo, nan enfòmasyon nou genyen yo.

Lajan yo anonse pou pwofesè yo

Mascary Lévêque di laprès lendi maten yo te kòmanse remèt pwofesè yo chèk yo menm jou a. Dapre li, anvan fen semèn nan, pwofesè yo ta dwe resevwa chèk mwa septanm yo, katòzyèm mwa yo ak kat debi yo.

Direktè depatmantal la di tou yon pakèt lèt nominasyon dwe rive semèn sa a.