Atak sibènetik : sa BRH mande bank yo fè ak sikilè 126 la

Devan atak sibènetik k ap ogmante, Bank Repiblik d Ayiti (BRH) raple bank yo ak lòt enstitisyon finansye nan peyi a gen règ sekirite enfòmatik pou yo respekte. Se sikilè 126 la ki fikse règ sa yo, depi 1ye fevriye 2022.

Nan yon avi bay piblik la 19 oktòb, gouvènè Ronald Gabriel te raple tou okenn enstitisyon finansye pa gen otorizasyon pou negosye ak kriminèl sibènetik k ap mande ranson. Lè gen yon atak, enstitisyon an dwe aktive plan kontenjans ak kontinyite l, epi ranfòse sistèm li dapre rezilta analiz ensidan an.

Yon politik ekri ak yon responsab endepandan

Sikilè a mande yon òganizasyon an premye. Chak enstitisyon dwe gen yon politik sekirite enfòmatik ekri, ki mete ajou chak ane e konsèy administrasyon an apwouve. Bank yo dwe gen yon komite sekirite enfòmatik tou.

Li dwe nonmen yon responsab sekirite enfòmatik ki endepandan de sèvis enfòmatik la, ki rapòte bay jesyon risk oswa direksyon jeneral la. Li dwe fòme anplwaye l sou risk yo tou.

Pwoteje done kliyan yo

Tèks la mande pou done yo toujou disponib, entak, konfidansyèl e pou yo ka swiv tout operasyon. Enstitisyon yo dwe klase enfòmasyon yo dapre nivo konfidansyalite, pwoteje tèt yo kont kòd malveyan, sekirize aksè adistans e kontwole aksè fizik nan sal enfòmatik yo.

Lè yon prestatè ap trete done pou yon bank, se bank lan ki dwe verifye li respekte règ sa yo.

Yon plan sekou yo teste

Chak enstitisyon dwe prepare, teste e kenbe ajou yon plan kontenjans pou l ka kontinye fonksyone nan nenpòt sitiyasyon. Li dwe prevwa yon sit enfòmatik sekou lwen sit prensipal la, ak sovgad yo verifye regilyèman pou pa pèdi done. Yon sous kouran sekou obligatwa tou.

Yon odit chak twazan

Yo dwe fè odit sekirite sistèm enfòmatik la omwen chak twazan. Yon enstitisyon ki pa fè l riske yon amann 200 000 goud, e BRH ka fè odit la sou kont li. Si li pa korije pwoblèm yo jwenn, amann lan se 100 000 goud chak jou.

Nan kòmansman oktòb, Capital Bank te fèmen sikisal li yo pandan plizyè jou apre yon ensidan enfòmatik. Gwoup pirat LockBit te di se li ki te atake, men bank lan pa t konfime sa.