Durkheim ap fè yon konsè entim nan Inivèsite Sherbrooke 20 novanm

Chantè ayisyen Durkheim ap fè yon konsè ak mizisyen l yo vandredi 20 novanm a 8 è diswa, nan Ti sal Sant kiltirèl Inivèsite Sherbrooke, nan Kebèk. Li anonse sa mèkredi 11 novanm sou Instagram, nan yon piblikasyon inivèsite a ak sant kiltirèl li a siyen avè l.

« Vin chante, danse e redekouvri chante m yo ant R&B, konpa ak soul », atis la ekri. Sant kiltirèl la pwomèt yon espektak entim kote piblik la ka dekouvri oswa redekouvri chante l yo « nan yon anbyans cho ».

Tikè

Tikè yo koute 40 dola kanadyen pou tout moun ak 32 dola pou etidyan ki gen 25 an oswa mwens. Gen frè anplis: 6 dola pou chak tikè sou entènèt ak 4 dola pa telefòn.

Anba anons lan, plizyè fanatik ann Ayiti ak Ozetazini mande l kilè l ap vin chante bò lakay yo. Li poko anonse okenn lòt dat.