Salvadò ap retire twoup li yo depi yo jwenn kat ayewoteknisyen li yo ; Ayiti vle pwolonje misyon an

Ekri paCarmelle Valmont
2 minit lekti
Salvadò ap retire sòlda li yo ann Ayiti depi yo jwenn kat ayewoteknisyen salvadoryen ki disparèt depi 18 oktòb yo. Gouvènman ayisyen an menm ta renmen misyon an kontinye pou batay kont gang yo ka kontinye.
« Si demen yo parèt, jan prezidan Bukele te di l la, nou retounen lakay », minis Sekirite salvadoryen an, Gustavo Villatoro, deklare lendi 16 novanm nan San Salvador, an mag dezyèm Konferans entènasyonal sou Leta ak demokrasi.
Minis Lajistis ak Sekirite piblik ayisyen an, Patrick Pélissier, ki te nan menm evènman an, di Premye minis Alix Didier Fils-Aimé ap prepare rankont ak otorite salvadoryen yo pou yo diskite sou yon pwolongasyon operasyon an. Dapre li, se youn nan rezon ki fè chèf gouvènman an pa t al nan konferans lan, kote yo te anonse l t ap la.
Patrick Pélissier ajoute Premye minis lan rankontre diferan fòs ki ann Ayiti yo, e tout ap travay « sou menm paj la » pou retabli sekirite: Polis nasyonal la, Fòs ame d Ayiti, Fòs pou kraze gang yo (FRG) ONI apiye a, twoup salvadoryen yo ak Task Force Ameriken Erik Prince dirije a.
Plis pase 2 000 militè salvadoryen te debake ann Ayiti nan fen oktòb, apre anbiskad 18 oktòb la nan Kwadebouke, kote kat ayewoteknisyen Fòs ayeryen salvadoryen an, ki manm FRG, te disparèt. Yo te jwenn machin blende yo a boule kòmansman novanm; pa gen okenn enfòmasyon ofisyèl sou sò yo.
Vis-prezidan salvadoryen an, Félix Ulloa, repete akò sekirite de peyi yo siyen an p ap pibliye toutotan « kondisyon diplomatik yo pa pèmèt sa ». Amnesty International te mande piblikasyon l semèn pase. Pa gen ni kalandriye pou retrè, ni akò pou pwolonje misyon an ki anonse.
Videyo
Pou w gade kounye a.
Ekri paCarmelle Valmont



Kòmantè0