Livres Solidaires Haïti, libreri bon mache Petyonvil la, ap fèmen 20 novanm

Apre plis pase dizan, libreri Livres Solidaires Haïti ap fèmen pòt li nèt 20 novanm. Libreri a, ki chita nan 92, ri Grégoire, Petyonvil, te konn vann liv li yo pi souvan ant 75 ak 150 goud.

« Pwojè a fini », responsab li, Béa Darline Legros, konfime. Jiska avril 2024, libreri a te distribye plis pase 600 000 liv nan peyi a.

Pa gen liv k ap soti aletranje ankò

Depi 2013, libreri a t ap resevwa liv dezyèm men asosyasyon Livres Solidaires te ranmase an Bèljik ak asosyasyon ansyen palmantè Kebèk yo te ranmase Okanada. Akò ak patnè bèlj la fini an desanm 2025. Bò kote Kanada, konpayi ki te konn transpòte liv yo vin Ayiti a sispann travay nan peyi a.

Libreri a te deja ap soufri ak pòs peyaj ilegal yo ak frè ladwàn ki prèske double nan dènye ane yo.

Mil enstitisyon p ap jwenn liv bon mache ankò

Ak anviwon 60 000 liv li te resevwa chak ane, depi 2022 Livres Solidaires Haïti t ap bay plis pase 1 000 enstitisyon atravè peyi a liv: lekòl, legliz, klib lekti ak sant pou timoun. Nan Jeremi, kèk sant kominotè te konn fè plizyè santèn kilomèt pou vin achte liv la.

Yon dènye braderi

Pou l vann tout liv li yo anvan l fèmen, libreri a ap fè yon gwo braderi depi 5 novanm, ak rabè jiska 50 %. Enstitisyon yo ka achte yon lo 100 liv pou 10 000 goud, e moun ka achte dis liv pou 1 500 goud.