Atis Steven Baboun resevwa tit « Creative Architect Icon » nan Island Icons Honors 2026

Atis ayisyen Steven Baboun resevwa tit « Creative Architect Icon » nan Island Icons Honors 2026, pri rezo karayibeyen CaribBiz Network bay. Òganizasyon an ak atis la anonse sa ansanm mèkredi 11 novanm sou Instagram.

Lè l t ap remèsye CaribBiz Network, Steven Baboun di se yon privilèj pou l ka « carry Ayiti into every room », sa vle di pote Ayiti nan tout kote l antre. Li dedye pri a bay fanmi l, zanmi l ak moun li travay avè yo: « Our greatest work is never created alone but together » (pi bèl travay nou pa janm fèt pou kont nou, se ansanm).

Yon mesaj pou jèn yo

Li pale ak jèn ayisyen yo tou, li ankouraje yo kwè nan sa yo kapab, epi kontinye reve menm lè bagay yo difisil. Dapre li, ide jèn ayisyen yo ka bati yon avni lemonn poko janm imajine.

Fotograf, reyalizatè, kreyatè

Steven Baboun soti Pòtoprens e li rete Nouyòk. Li se fotograf, direktè atistik, pwodiktè ak pwofesè. Li gen yon diplòm nan sinema nan American University ak yon metriz nan fotografi nan Parsons School of Design. Li travay ak foto, videyo, pèfòmans ak enstalasyon twal. Se li ki dirije Studio Baboun, yon kay kreyasyon nan Brooklyn.

Travay li chita sou kilti ayisyen: se li ki fè seri « Fèt Gede », « Fèt Èzili » ak « Granbwa », ansanm ak « Islam in Haiti » ak « Syria and Haiti Holding Hearts ». Yo montre travay li nan Bronx Museum of the Arts, nan Haiti Cultural Exchange, nan Haitian American Museum Chicago, nan festival Photoville, e rive jis Seoul, nan Kore di Sid.

Se li tou ki direktè atistik sèn ak pwodiktè « BAYO », espektak DJ ak pwodiktè ayisyen Michaël Brun, e li se youn nan moun ki fonde ajans kreyasyon NativRoots Collective.