Sylvio-Cator : PNH reprann estad la epi l remèt li bay fòs salvadoryen yo

Polis Nasyonal Ayiti (PNH) di li reprann « kontwòl total » estad Sylvio-Cator ak zòn ki antoure l yo, nan mitan Pòtoprens, nan yon operasyon li fè ak Task Force la byen bonè jedi 12 novanm nan maten.

Apre yo fin reprann zòn nan, PNH di li remèt kontwòl li bay fòs salvadoryen yo, ki « pran relèv la » pou konsolide zòn sa a. Se premye fwa polis la limenm anonse militè salvadoryen yo nan estad nasyonal la.

Tank sou teren an

Sòlda salvadoryen pran pozisyon jedi nan estad la, ak plis pase ventèn machin blende ak kamyon, dapre yon sous ki pwòch Fòs Ame Dayiti (FAd'H), ki te deja deplwaye nan zòn nan. Foto PNH pibliye ki pran anwo nan syèl la montre yon ranje machin blende kanpe sou teren an, bò kote tribin yo.

Gen videyo ki sikile jedi ki montre tank ak militè salvadoryen sou Channmas tou, nan direksyon estad la. Dapre enfòmasyon nan laprès, fòs salvadoryen yo ta gen lide enstale yon baz la. Ni otorite ayisyen ni otorite salvadoryen pa konfime sa.

Polis la pa bay okenn bilan operasyon an. Li pa presize si te gen batay, arestasyon oswa viktim.

Prezans salvadoryen an fè deba

Anviwon 2 000 sòlda salvadoryen ki deplwaye an Ayiti yo nan mitan yon deba diplomatik. Sekretè Deta ameriken an, Marco Rubio, di li ta renmen wè yo ale pi vit posib. Premye minis Alix Didier Fils-Aimé gen pou l ale Salvador 16 ak 17 novanm pou pale sou avni twoup sa yo.

Ministè Espò a pwomèt pou l reyabilite estad la

Ministè Jenès, Espò ak Aksyon sivik (MJSAC) salye rekiperasyon estad la nan yon kominike vandredi 13 novanm. Li wè sa kòm « yon etap desizif » pou lòd tounen e pou yo repran espas sivik ak espòtif kapital la.

Ministè a di li deja ap travay pou remete estad la sou pye. Gouvènman an pran angajman pou l lanse yon reyabilitasyon konplè, men sèlman lè zòn nan sekirize e lavi repran nan sant vil la. Kominike a pa bay ni dat, ni bidjè.