Sa gen 58 an, Ayiti te bat Etazini 5-2 nan Silvio Katò

Grenadye yo ap jwe kont Etazini samdi 14 novanm sa a nan Miami. Sa gen 58 an, 21 oktòb 1968, Ayiti te bat seleksyon ameriken an 5-2 nan estad Silvio Katò, nan yon match amikal ki rete nan listwa.

Jou sa a, Hugues « Jacquot » Guillaume te make twa gòl nan dis minit, nan 34yèm, 40yèm ak 44yèm minit.

Yon revanj nan demen

Ameriken yo te vin Ayiti pou yon seri twa match amikal. Yo te deja bat Ayiti de fwa Pòtoprens an avril 1954, nan eliminatwa Koup di Mond Laswis la (3-2 ak 3-0).

Premye match la, 20 oktòb 1968, te tounen an favè vizitè yo ankò (6-3). Men nan demen, mesye Antoine Tassy yo te pran revanj yo.

Jean Reynold Saint-Surin te louvri eskò a nan 6yèm minit. Answit Jacquot, jwè Aigle Noir, te make twa gòl li yo anvan mitan tan an, e Joseph « Zocil » Obas te ajoute senkyèm gòl la nan 57yèm minit. Siegfried Stritzl ak Peter Millar te make pou Etazini.

Dapre Le Grenadier, twa gòl Jacquot yo rete jiska jodi a sèl « hat-trick » yon jwè ayisyen fè kont seleksyon ameriken an. De jou apre, 23 oktòb, Ayiti te genyen ankò, 1-0, gras a Guy Saint-Vil.

Yon bèl seri, epi anyen depi 1973

Apre sa, Ayiti te bat Etazini de fwa nan eliminatwa Koup di Mond 1970: 2-0 Pòtoprens 20 avril 1969, epi 1-0 Ozetazini 11 me. Grenadye yo te genyen de lòt match amikal, 1-0, an novanm 1973.

Depi lè sa a, Ayiti pa janm bat Etazini ankò. Dènye rankont yo te fèt sitou nan Gold Cup, e dènye a, 22 jen 2025, te fini ak yon viktwa ameriken 2-1.

Match samdi a ap kòmanse a 4 è 30 nan apremidi, nan Miami.