Ale dirèkteman nan atik la

#NOUVÈL · An dirèk · Caribbean

Jamayik : lapolis Portland sispèk gen yon rezo òganize dèyè Ayisyen k ap debake yo

Photo
FotoImage : Jamaica Constabulary Force (podcast Force4Good, S2 ép. 26) · Jamaica Constabulary Force
0

Ekri pa Prisca Macena

3 minit lekti

Lapolis jamayiken sispèk yon pati nan Ayisyen k ap debake regilyèman sou kòt pawas Portland, nan nòdès zile a, vini atravè yon rezo òganize. Sipèentandan Ainsley McCarthy, ki kòmande lapolis Portland, ak komisè adjwen McArthur Sutherland, chèf zòn 2 (Portland, St Mary ak St Ann), te di sa nan dènye epizòd « Force4Good », podkas lapolis jamayiken an (JCF), ki te soti 16 novanm.

« Ayisyen sa yo ki rive de tanzantan, gen ladan yo ki viktim trafik. Yo peye pou yo vin isit, epi gen moun ki vin chèche yo pou mennen yo lòt kote, pi souvan andeyò pawas la », Ainsley McCarthy di, pandan l site kominote ayisyen ki deja enstale Montpelier, nan pawas St James.

Dapre McArthur Sutherland, anpil nan migran sa yo ap travay latè pou Jamayiken nan mòn Portland, e lapolis fè plizyè operasyon kont pratik sa a. « Nou gen ase rezon pou n kwè li òganize, jiska yon sèten pwen », li di, pandan l bay kòm prèv moun ki te deja ekspilse ki retounen. Li pale tou de yon diskisyon ant de migran ane pase, nan yon fèt sou yon jaden, ki te koute youn ladan yo lavi; dosye a toujou devan tribinal. Lapolis pa anonse okenn akizasyon pou trafik e li pa nonmen okenn moun yo sispèk ki òganize l.

Kantite moun k ap debake yo vin pi plis nan dènye mwa yo. An jen, yon gwoup 17 Ayisyen te pase anba kontwòl lapolis nan Passley Gardens, toupre Port Antonio, e lòt gwoup te arete fen septanm ak kòmansman oktòb nan Portland, St Mary ak St Ann. Dapre polisye yo, gen ladan yo ki kite bato a nan lanmè epi naje rive sou rivaj la pou yo pa wè yo.

McArthur Sutherland panse Jamayik bezwen mwayen pou siveye lanmè a ak yon rezo ransèyman nan rejyon an, paske zile a gen anpil pwen antre ki pa kontwole. Li rekonèt moun sa yo ka viktim trafik oswa yo ka ap chèche refij, « selon jan w gade l ».

Lè yo rive, komite lokal jesyon risk la pran yo an chaj: Lakwa Wouj bay manje ak rad, sèvis sante a fè egzamen medikal, epi ajans imigrasyon an (PICA) fè entèvyou. Pifò ladan yo voye tounen Ayiti; sa ki mande azil, se lajistis ki egzamine dosye yo, Ainsley McCarthy presize.

Plis sou istwa sa a

← Retounen nan fil an dirèk la

Kòmantè 0

An editor reads every comment before it appears. NAGO does not publish a comment it has not read.

  • N ap chaje kòmantè yo…