Konsèy minis yo valide akò kowoperasyon ant Ayiti ak Salvadò

Ekri pa Prisca Macena
2 minit lekti
Konsèy minis yo valide akò kowoperasyon ant Repiblik d Ayiti ak Repiblik Salvadò madi 17 novanm 2026. Reyinyon an te fèt nan Vila Akèy, Pòtoprens, anba prezidans Premye minis Alix Didier Fils-Aimé.
Gouvènman an prezante akò a tankou yon nouvo etap nan relasyon ant de peyi yo ak nan kowoperasyon pou fè fas ak pwoblèm sekirite Ayiti. Kontni akò a poko fèt piblik.
Minis yo te egzaminen tou modènizasyon Fòs Ame d Ayiti, ranfòsman lit kont blanchiman lajan ak finansman teworis, angajman entènasyonal Ayiti nan zafè lanmè, amenajman teritwa a, valorizasyon patrimwàn nasyonal la, rekonesans enstitisyon sosyal ak relijye, ak ranfòsman reprezantasyon diplomatik peyi a.
Gouvènman an di li vle « konsolide otorite Leta » epi « defann souverènte nasyonal la », pou sekirite ak estabilite tounen nan peyi a pou de bon.
Minis Touris la, Stephanie Smith, ki te nan reyinyon an, mare dosye sa yo ak sektè pa l: li ekri okenn peyi pa ka bati yon destinasyon touristik ki atire moun epi ki dire, si li pa garanti sekirite ak estabilite pou sitwayen l yo ak pou vizitè yo. Pou li, retou sekirite a dwe redonnen envestisè yo konfyans epi fè vizitè yo tounen.
Reyinyon an fèt menm jou milye moun te manifeste Pòtoprens ak nan pwovens pou sipòte prezidan salvadoryen an, Nayib Bukele, ak sòlda salvadoryen ki deplwaye Ayiti yo. Salvadò di l ap retire twoup li yo depi yo jwenn kat ayewoteknisyen li yo; gouvènman ayisyen an vle pwolonje misyon an.
Videyo
Pou w gade kounye a.
Stephanie Smith, ministre du Tourisme (Instagram) (17 nov. 2026)
NAGO News, « Manifestations pro-Bukele » (17 nov. 2026)
Ekri pa Prisca Macena



Kòmantè 0