Ki moun k ap peye lobiyis Michel Martelly yo ? Sa kontra yo depoze Washington nan di

Ki moun k ap peye konpayi lobi ki gen pou fè Etazini leve sanksyon yo pran kont Michel Martelly ? Dapre kontra yo depoze 5 novanm 2026 nan Depatman Lajistis ameriken an, se pa ansyen prezidan an, men yon konpayi nan Miyami ki rele Invisible Investigations, LLC. Yon konpayi lobi se yon biwo moun peye pou al pale ak otorite yo pou chanje yon desizyon. Konpayi Liberty Government Affairs, LLC enskri kòm ajan yon kliyan etranje, jan lwa FARA mande. Lwa sa a oblije moun k ap fè lobi pou enterè etranje deklare tèt yo epi pibliye kontra yo.

Se Edward Haynes ki siyen kontra a pou Invisible Investigations, pa Michel Martelly. Dokiman an di Michel Martelly se « moun ki gen pou benefisye » sèvis yo. Rejis Lajistis ameriken an di kliyan an se « Michel Joseph Martelly (atravè Invisible Investigations LLC) », ak yon adrès Petyonvil.

Kontra a gen dat 22 oktòb 2026. Brian Darling, ki dirije konpayi lobi a, siyen l. Li mande yon depo 125 000 dola ameriken, epi 50 000 dola chak mwa. Depans pou vwayaj ak reyinyon yo ap ranbouse jiska 5 000 dola pa mwa. Konpayi an di li deja resevwa 75 000 dola nan men Invisible Investigations 10 septanm 2026, kòm depo. Premye peryòd la fini 31 desanm 2026. Apre sa, kontra a ap renouvle chak mwa.

Konpayi an gen pou l al pale ak Trezò ameriken an ak Depatman Deta a, sa vle di ministè zafè etranjè Etazini. Dapre kontra a, objektif la se fè chanje yon fason Etazini sèvi ak OFAC, biwo ki okipe sanksyon yo, pou sanksyone etranje « pou rezon ki pa gen ase prèv oswa baz legal ». Konpayi an ap fè estrateji, rankontre otorite nan administrasyon an, epi bay rapò regilyèman. Li di klè li pa garanti okenn rezilta.

Kontra a gen yon kloz sou lajan an. Invisible Investigations di Michel Martelly p ap remèt li lajan sa yo, ni « dirèkteman ni endirèkteman ». Lajan an dwe soti sèlman nan dola ki deja depoze nan bank Ozetazini.

Trezò ameriken an te sanksyone Michel Martelly 20 out 2024. Washington akize l li te ede trafik dwòg, sitou kokayin ki t ap ale Ozetazini, epi li te sipòte gang ame. Dapre kontra a, li sou yon lis sanksyon « a la kat » OFAC, pa sou lis moun yo bloke tout byen yo. Kanada sanksyone l depi novanm 2022, e Inyon Ewopeyen depi 2025.

Demach sa yo ap fèt pandan ansyen prezidan an vle retounen sou pouvwa a. 23 oktòb, li te depoze kandidati l pou eleksyon prezidansyèl ki prevwa pou 13 desanm nan, anba banyè kowalisyon Debloke, ki rasanble ansyen manm pati li a, PHTK. Konsèy elektoral pwovizwa a (CEP) poko valide kandidati l. Sou rezo sosyal yo, yon mouvman, sitou ak jèn, kanpe kont kandidati l ak kandidati lòt figi nan menm banyè a. Eslogan li, « Nou p ap vote vòlè ankò », ap sikile sou TikTok, Facebook, Instagram ak YouTube, kote moun menm fè chante avè l.

Michel Martelly poko reyaji piblikman sou enfòmasyon sa yo.