Outlook an pàn toupatou sou latè : Microsoft di se pa yon atak sibènetik

Mesajri Outlook Microsoft la tonbe an pàn pou itilizatè nan 74 peyi ak teritwa depi jedi 12 novanm. Sèvis Teams ak Copilot yo te gen pwoblèm tou. Dapre Microsoft, pa gen anyen ki montre se yon moun ki fè sa espre oswa se yon atak sibènetik.

Pàn nan kòmanse jedi vè 11 è 17, lè Ayiti, lè itilizatè nan Amerik yo pa t ka louvri bwat imèl yo ankò, ni sou entènèt ni sou aplikasyon yo. Apre sa, Microsoft rekonèt itilizatè nan tout rejyon te touche.

Plizyè dizèn milye plent

Lè pàn nan te pi fò, sit Downdetector anrejistre prèske 140 000 plent nan lemonn, ladan yo plis pase 130 000 Ozetazini. Microsoft pa di konbyen itilizatè ki te touche.

Sèvis la ap tounen tanzantan

Konpayi an di pwoblèm nan soti nan twòp chaj sou enfrastrikti l nan plizyè rejyon. Li di li wè « estabilite sèvis la amelyore » e l ap mete koreksyon yo nan tout rejyon ki touche yo. Vandredi, sèvis la te tounen nan yon pati nan Azi-Pasifik, men te gen pwoblèm toujou lòt kote.