Prezidansyèl : Dominique Dupuy, ansyen minis Afè etranjè, dezyèm fanm ki enskri pami 26 kandida

Ansyen minis Afè etranjè a, Dominique Dupuy, enskri kòm kandida pou prezidans. Non li parèt sou lis kandida Konsèy elektoral pwovizwa a (CEP) mete sou entènèt. Lè nou tcheke l mèkredi 11 novanm, lis la mete l kòm kandida tit pou Pati Vizyon Dayiti (PVD).

Gen 26 moun ki enskri pou prezidans sou lis CEP a. Se de fanm sèlman ki ladan yo: Dominique Dupuy ak Marie-Anne Savannah Hadid Savary. Lòt 24 yo se gason. Pami yo gen ansyen prezidan Michel Martelly, ansyen prezidan pwovizwa Jocelerme Privert ak ansyen depite Jerry Tardieu.

Enskri pa vle di aksepte

Enskri sou entènèt se premye etap la sèlman. Chak kandida gen pou depoze dosye l, epi CEP ap verifye l anvan li pibliye lis kandida li aksepte yo. Dapre yon nòt CEP pibliye 10 novanm, kandida pou prezidans ak pou palman an gen jiska 15 novanm a minui pou yo enskri sou entènèt, epi yo gen jiska 30 novanm pou yo depoze dosye yo.

Sou kont Instagram li, Dominique Dupuy pibliye yon ti videyo ki rele « Manman an Rive ». Li poko prezante yon pwogram an detay.

Soti UNESCO rive nan ministè a

Dominique Dupuy te anbasadè Ayiti nan UNESCO depi janvye 2021. Se li ki te pote dosye soup joumou a, premye bagay ayisyen UNESCO mete sou lis eritaj kiltirèl limanite.

An mas 2024, yo te chwazi l pou l chita nan Konsèy prezidansyèl tranzisyon an, men li te retire kò l, li di se atak politik li t ap sibi. Apre sa, li te minis Afè etranjè, Kilt ak Ayisyen k ap viv lòt bò, depi 12 jen rive 16 novanm 2024.