Amnesty mande Ayiti ak Salvadò pibliye akò sou deplwaman sòlda salvadoryen yo

Amnesty International mande gouvènman Ayiti ak gouvènman Salvadò a pou yo fè piblik akò ki fikse règ pou deplwaman apeprè 2 000 militè salvadoryen an Ayiti.

Nan yon deklarasyon li pibliye lendi 9 novanm 2026, direktris òganizasyon an pou Amerik yo, Ana Piquer, di Premye minis Alix Didier Fils-Aimé ak prezidan Nayib Bukele « dwe asire tout operasyon fòs salvadoryen yo mennen an Ayiti respekte dwa entènasyonal ki gen rapò ak dwa moun ».

Sa Amnesty mande

Òganizasyon an mande de gouvènman yo pou yo eksplike ki jan yo kontwole fòs sa yo, ki règ ki gouvène kijan yo ka sèvi ak fòs, devan ki moun yo gen pou yo rann kont, ak ki jan popilasyon an ka denonse abi san yo pa pè pran revanj.

Li raple tout fwa yo sèvi ak fòs, yo dwe respekte prensip lalwa, nesesite ak pwopòsyonalite. Li mande tou pou gen mezi pwoteksyon pou timoun yo, sitou sa ki gang yo rekrite, ak pou gen ankèt rapid, endepandan e san patipri lè gen vyolasyon. Dapre Ana Piquer, deplwaman an « pa dwe repwodui abi ak enpinite » entèvansyon ki te fèt anvan yo an Ayiti.

Deyò kontwòl ONU

Pòtparòl sekretè jeneral ONU a, Stéphane Dujarric, presize pi fò militè salvadoryen ki fenk deplwaye yo pa fè pati Fòs Represyon Gang yo (FRG) ONU a otorize a. Se poutèt sa, Biwo Nasyon Zini pou Sipò an Ayiti pa swiv yo.

Amnesty mande tou pou yo fè limyè sou sò kat militè salvadoryen ki disparèt depi 18 oktòb la, epi si yon gang kenbe yo, pou yo lage yo san pèdi tan.