Peman rejyonal : BRH nan Belize pou reyinyon gouvènè bank santral CARICOM yo

Ekri pa Desir Dorcely
2 minit lekti
Gouvènè Bank Repiblik d Ayiti (BRH) a, Ronald Gabriel, te patisipe 19 ak 20 novanm nan Belize City nan 67yèm reyinyon chak sis mwa gouvènè bank santral Kominote Karayib la (CARICOM), dapre BRH. Se Kareem Michael, gouvènè Bank santral Belize, ki te prezide reyinyon an.
Diskisyon yo te sou defi ekonomik rejyon an ak sou kijan pou fasilite peman ant yon peyi ak yon lòt. Dapre BRH, ti ekonomi Karayib yo, tankou Ayiti, ap fè fas ak ensètitid ekonomi mondyal la, ak risk klimatik yo ak teknoloji k ap chanje vit. Gouvènè yo apwouve yon kad komen pou pibliye pi vit estatistik moun ka konpare ant peyi yo.
Sou kesyon peman, ekip Sistèm panafriken peman ak règleman an (PAPSS) prezante modèl li, ki pèmèt peyi yo regle tranzaksyon ant yo nan pwòp lajan lokal yo. Gouvènè yo fè pwen sou faz pilòt sistèm peman ak règleman CARICOM nan (CAPSS): talè konsa, bank nan peyi k ap patisipe yo pral resevwa envitasyon pou yo pran pa nan esè yo.
Gouvènè yo apwouve tou pou yo prepare yon fèy wout pou konekte diferan sistèm peman rejyon an. Se Bank santral Jamayik ki pral dirije travay sa a, avèk sipò Bank santral Karayib oryantal la. BRH pa di si bank ayisyen pral patisipe nan esè CAPSS yo.
Videyo
Pou w gade kounye a.



Kòmantè 0